Sep

27

ՀԵՐԹԱԿԱՆ ՇՈՈՒՆ Է, ԼՈՒՐՋ ԲԱՆ ՉԿԱ

Filed Under Iravunk newspaper 

Չնայած վերլուծաբանները հասցրել են նկատել, թե դաշնակցություն-հանրապետական ներկոալիցիոն հարաբերություններում առանձնապես լուրջ բան չկա, այդուհանդերձ, ոմանք էլ պնդում են, թե վերջին հակասությունները կարող են քաղաքական նոր «քարտեզագրման» հանգեցնել: Հարցի առնչությամբ «Իրավունքի» «Կլոր սեղանի» շուրջ իրենց դիրքորոշումն են ներկայացնում ԱԼԵՔՍԱՆ ԿԱՐԱՊԵՏՅԱՆԸ («Ազգային միաբանության» փոխնախագահ), ԱՐՇԱԿ ՍԱԴՈՅԱՆԸ (ԱԺԴ նախագահ), ԱՐԱՐԱՏ ԶՈՒՐԱԲՅԱՆԸ (ՀՀՇ վարչության նախագահ), ԳԵՂԱՄ ՄԱՆՈՒԿՅԱՆԸ (ՀՅԴ)։

ԹՂԹ.- Նախ փորձենք ճշգրտել. հնարավո՞ր է, որ վերջին փոխհրաձգություններից հետո ՀՀԿ-ՀՅԴ հարաբերություններն այնքան վատանան, որ կոալիցիան իր կյանքն ավարտի մինչ նախագահական ընտրություններ:
ԳԵՂԱՄ ՄԱՆՈՒԿՅԱՆ - Չէ՛, չեմ կարծում, ինձ թվում է` չափազանցված է այդ իրավիճակը, բացի այդ` մենք պրոբլեմ չունենք:
ԹՂԹ.- Բայց ՀՀԿ-ի համար կարծեք լուրջ խնդիր է դարձել Ձեր իշխանություն կամ ընդդիմություն լինելու հանգամանքի «բացահայտումը»: Եթե խնդիր չունեք էլ, խնդիր առաջացրել եք, չե՞ք կարծում:
ԳԵՂԱՄ Մ.- Ես բոլորին կարող եմ միայն մի խորհուրդ տալ` կարդալ կոալիցիայի և դաշնակցության միջև կնքված համաձայնության հուշագիրը: Մենք որևէ պրոբլեմ չունենք. մենք էդ հուշագրի սահմաններում ենք գործում, քաղաքական գործունեություն ծավալում, և եթե որևէ մեկը պրոբլեմ ունի, թող բարձրաձայն ասի դրա մասին, որովհետև լուծման ելքերն էլ կան: Օրինակ, առաջարկվում է վերանայել հուշագիրը: Մենք ասում ենք այն, ինչ մենք ի սկզբանե ամրագրել ենք:
ԹՂԹ.- Պարոն Մանուկյան, բայց պարզ չի՞, որ եթե իշխանության անդամն ասում է` մենք այլընտրանք ենք և՛ ընդդիմությանը, և՛ իշխանությանը, այստեղ խնդիր կա: Չե՞ք կարծում, որ հենց Դուք պիտի այդ դեպքում նախապես առաջարկեիք վերանայել հուշագիրը:
ԳԵՂԱՄ Մ. - Ախր, պարզ չե՞մ ասում. իրենցից ով որ ասում է` անհասկանալի է մեր պահվածքը, պիտի նախ և առաջ ոչ թե մամուլին ասի դրա մասին, այլ մեզ` նախաձեռնելով հուշագրի վերանայման հարցը: Բայց նախ թող կարդան հուշագիրը, նոր խոսենք: Վերջ, ես արդեն պատասխանեցի այս հարցին և այլևս ասելիք չունեմ:
ԱՐԱՐԱՏ ԶՈՒՐԱԲՅԱՆ- Անշնորհակալ գործ է այդ հարցի վերաբերյալ որևէ մեկնաբանություն անելը, որովհետև որոշակի ինֆորմացիայի պակաս կա կամ դրդիչ ուժերն ու հանգամանքները կարող են տարբեր լինել: Այս ամենը կարող է և՛ արհեստականորեն ձևավորված տարաձայնություն լինել, և՛ իսկապես մի բնական պրոցես լինել, որում խաղի կանոն է փոխվել, ու մնում է միայն դրան պաշտոնական տեսք տալ: Նկատի ունեմ` փոխել կոալիցիայի կազմը և այլն: Ժամանակը ցույց կտա:
ԹՂԹ.- Փաստորեն, Դուք երկու տարբեր սցենար եք առաջ քաշում. կարո՞ղ եք գոնե մոտավոր ձևակերպել դրանք:
ԱՐԱՐԱՏ Զ.- Մի դեպքում սա կարող է սցենար լինել հօգուտ ՀՅԴ-ի, որով վաղն իշխանությունից դժգոհ մի որոշակի զանգվածի կկարողանան, այսպես ասած, հեռու պահել ընդդիմությունից, մյուս սցենարն էլ այն է, որ իրոք սա վախճանն է կոալիցիայի, ինչը կարող է շատ էլ բնական բան լինել: Դուք գիտեք, որ այս կոալիցիան ամբողջովին արհեստածին էր, միավորվել էին գաղափարախոսություններով իրար բացարձակ հակադիր ուժեր` միավորվելով ընդամենն իշխանությունը պահելու հիմքի վրա: Բնականաբար, մի բան ողջունելի է, որ այսօր, փաստորեն, դաշնակցությունը մի բան է արձանագրում, որ այն, ինչ ինքը տվել է Ռոբերտ Քոչարյանին, չի տալու Սերժ Սարգսյանին: Եթե սա խաղ չէ, սրա մեջ, անշուշտ, ինչ-որ հետաքրքրական պահ կա: Անգամ եթե հիշում եք` Լևոն Տեր-Պետրոսյանի առաջադրման հնարավորությունը քննարկելու ժամանակ դաշնակցության անդամների արտահայտած մտքերում այնպիսի մի երանգ կար, որ եթե այդպես լինի, շատ էլ լավ կլինի, մենք վերջապես կկարողանանք գաղափարական պայքար ծավալել, կհստակվի` ով ինչ է ուզում և ինչ կերպ:
ԹՂԹ.- Փաստորեն, Դուք կարծում եք, որ սա Քոչարյանի վերջին նվե՞րն է դաշնակցությանը:
ԱՐԱՐԱՏ Զ.- Եթե Դուք ընթացքում հետևեցիք իմ մտքին, ես արդեն ասացի, որ, այո՛, հնարավոր է, սա ամենաբարձր մակարդակով կազմակերպված քաղաքական տեխնոլոգիա լինի, ընդ որում` ոչ թե ընդդեմ մեկի, այլ հանուն մյուսի: Բայց սպասենք, տեսնենք՝ ինչ պրոցեսներ կընթանան: Կարծում եմ, երկար ժամանակ չի պահանջվի, որ այս ամենը հասկանանք: Տարրական մի բան կա. կա հասարակության հստակ մի զանգված, որը ոչ մի գնով ձայն չի տա Սերժ Սարգսյանին, և դաշնակցությունը պիտի աշխատի այդ զանգվածի վրա` առաջարկելով այլընտրանք ընդդիմությանը, այլընտրանք իշխանությանը իր մոդելը: Կա նաև հարցի երկրորդ կողմը` ցույց տալ, թե իսկապես քաղաքական պայքար կա, որ իշխանությունները մտահոգ են ազատ-արդար ընտրությունների անցկացման հարցով, նաև ամեն բան անելու են, որ այս միֆը հանրությունը հնարավորինս լավ մարսի: Որքանով արդյունավետ` էլի ժամանակը ցույց կտա: Կարծում եմ, շատ ժամանակ չի պահանջվի այս ամենը ջրի երես դուրս բերելու համար: Սա ակնհայտ է:
ԹՂԹ.- Իսկ դաշնակցության` երկու թեկնածու առաջադրելու և ներկուսակցական-ներհանրային ընտրության արդյունքում բուն ընտրությունների ընթացքում մի թեկնածուի վրա կենտրոնանալու քաղաքական տեխնոլոգիա՞ն ինչպես եք գնահատում:
ԱՐԱՐԱՏ Զ. - Դա իսկապես քաղաքական տեխնոլոգիա է, և պիտի ասեմ, որ ցանկացած կուսակցություն ազատ է օրենքի շրջանակներում իր ուզած ռազմավարությունն ու մարտավարությունն ընտրելու հարցում: Միանշանակ է, որ սա ուշադրություն գրավելու, հանրության հետաքրքրությունն անընդհատ դեպի իրենց տանելու փորձ է, որը, ի դեպ, կաշխատի հենց միայն այն պատճառով, որ դրա մասին անընդհատ կխոսվի` դաշնակցությանը հնարավորություն տալով միշտ քաղաքական ասպարեզում լինել: Ամեն դեպքում, կարծում եմ, վատ չէ մտածված:
ԱԼԵՔՍԱՆ ԿԱՐԱՊԵՏՅԱՆ - Ներկոալիցիոն հակասություններն ԱՄ-ն մեկնաբանում է որպես կոալիցիայի ներքին գործը:
ԹՂԹ.- Ի դեպ, ես դա կարող եմ իբրև պատասխանից խուսափելու փորձ նկատել, որովհետև քաղաքական գործիչ լինելով` Դուք շատ լավ գիտեք, որ անգամ ներկուսակցական առանձին հարցը կարող է կուսակցության «սեփականությունը» չլինել, որովհետև շատ լուրջ ազդեցություն կարող է ունենալ առհասարակ քաղաքական համակարգի վրա: Հիմա Դուք ուզում եք ասել, որ պետության կառավարումն իր ձեռքը վերցրած կոալիցիայի ճակատագիրն այնքան անկարևոր է, որ նույնիսկ գանահատականի՞ կարիք չունի…
ԱԼԵՔՍԱՆ Կ. - Չէ, դե հիմա Դուք բան եք ասում, որ համ Դուք եք ճիշտ, համ` ես: Բայց, դե, քանի որ գործող անձինք իրենք են, իրենք էլ մի կարգին բան չեն ասել, որ հասկանաս` կոնկրետ խոսքն ինչի մասին է, ի՞նչ ասեմ: Գնահատական տալը կոռեկտ չէ: Ես այդպես եմ կարծում: Թող իրենք իրենց հարաբերություններն իրենց մեջ ճշտեն, բարձրաձայն ամեն մեկն իր կարծիքն ասի, և երբ մենք տեսնենք, որ պրոցեսները վտանգում են մեր պետականության հիմքերը, կողք չենք քաշվի և անպայման մեր կարծիքը կասենք: Ընդհանուր առմամբ, ամսի 29-ին՝ մեր համագումարի ընթացքում, բոլոր այդ հարցերին պատասխան կտանք: Կանդրադառնանք թե՛ ներքին, թե՛ արտաքին մարտահրավերներին:
ԱՐՇԱԿ ՍԱԴՈՅԱՆ- Ես, ճիշտն ասած, այնքան էլ մեծ «փոխհրաձգություն» չեմ տեսել ՀՀԿ-ՀՅԴ հարաբերություններում։ Դրանք ցուցադրական բաներ են, որ միշտ էլ լինում են, և որով բոլոր կողմերն էլ կամենում են ցույց տալ, թե այս երկրում այլակարծություն կա, բան կա, ամեն ինչ կարգին է: Սա, այսպես ասած, հերթական շոուն է, և կարծում եմ` լուրջ բան չկա:
ԹՂԹ.- Հետաքրքիր մոտեցում էր. փաստորեն, երկու կողմերն էլ նույն նպատակի համար են աշխատում, այո՞…
ԱՐՇԱԿ Ս.- Դե՛, նպատակն այն է, որ ցույց տան, թե Հայաստանում կա ազատ կարծիք, քաղաքական պայքար կա և այլն: Առավել ևս, որ դաշնակցությունը ներսում ու դրսում էլ ունի պրոբլեմներ. նա պետք է իր շարքերին ցույց տա, որ ինքն անկախ է, առուծախ չկա, էդպիսի բաներ: Իսկ «փոխհրաձգություն» ասվածը, նորից եմ կրկնում, հերթական շոու է` նաև ժողովրդի աչքերին թոզ փչելու համար: Լուրջ որևէ բան չեմ տեսնում:

Զրույցը վարեց ԳՈՀԱՐ ՍԻՄՈՆՅԱՆԸ
Source: http://www.iravunk.am/

Permanent link:  http://www.armpress.com/iravunk/2007/09/27/83/

Comments

Leave a Reply

You must be logged in to post a comment.

    Wednesday, 08 September 2010

  • Admin

  • Calendar

    • September 2007
      M T W T F S S
          Oct »
       12
      3456789
      10111213141516
      17181920212223
      24252627282930

  • Archives

  • Links

  • International newspers: