Apr

15

Մեր հիմնական ներուժը մեր ժողովրդի ինտելեկտն է

Filed Under Hayastany Hanrapetutyun daily 

Հայտարարեց վարչապետ Տիգրան Սարգսյանը՝ այցելելով աշխատանքի տոնավաճառԵՊՀ շրջանավարտների ու կարիերայի կենտրոնը եւ «ԵՊՀ շրջանավարտների միավորում» հասարակական կազմակերպությունը երեկ «Արմենիա—Մարիոթ» հյուրանոցում հայտարարեցին Հայաստանում բանկային եւ ֆինանսական ոլորտի առաջին աշխատանքային տոնավաճառի մասին։

Բացման արարողությանը ներկա էր նաեւ ՀՀ վարչապետ Տիգրան Սարգսյանը։ «Ես ձեզ կխնդրեի եւս մեկ անգամ ծանոթանալ ՀՀ նախագահի նախընտրական ծրագրին ու կառավարության ծրագրին, եւ դուք կտեսնեք, որ գիտելիքի վրա հիմնված տնտեսությունը թիվ մեկ առաջնահերթությունն է, այն պարզ պատճառով, որ մենք այլընտրանք չունենք։ Մեր հիմնական ներուժը մեր ժողովրդի ինտելեկտն է», – ողջույնի խոսքում նշեց վարչապետը՝ միաժամանակ հավելելով, որ այսպիսի ձեռնարկները (իմա՝ տոնավաճառը) նպատակ ունեն կարեւորելու այս հանգամանքը։ «Հեղափոխական փոփոխություն այս ոլորտում կարող ենք անել, եթե հասարակության վերաբերմունքը փոխվի։ Եթե մենք հասկանանք, որ ՀՀ—ում հարստանալու միակ ճանապարհը գիտելիք ձեռք բերելն է՝ ոչ թե զոռբայություն, ոչ թե լկտիություն, այլ՝ գիտելիք։ Եվ մենք մեզանից պետք է սկսենք. պետք է կարեւորենք գիտելիք կրողներին։ Իսկ դուք պետք է խստապահանջ լինեք մեր նկատմամբ։ Պետք է թույլ չտաք, որ հասարակությունում իշխեն մարդիկ, ովքեր տգետ են եւ անդաստիարակ»,– ՀՀ վարչապետը սա համարեց երաշխիքը այն բանի, որ հնարավոր կլինի կրթական համակարգում փոփոխություն կատարել։

Ցավոք, ըստ Տիգրան Սարգսյանի, հաճախ ենք ականատես լինում, որ ուսանողության շրջանում գիտելիք ձեռք բերելու ձգտում չկա. «Որովհետեւ մարդիկ տեսնում են, թե հասարակությունում ինչ տրամադրություններ են տիրում եւ հասկանում են, որ կարիերա անելու, հարստանալու համար անհրաժեշտ չէ գիտելիք ունենալ, ինչը վտանգավոր ճանապարհ է։ Ամենակարեւոր քաղաքացին Հայաստանի Հանրապետությունում պետք է լինի տաղանդավոր երիտասարդը, տաղանդավոր աշակերտը, տաղանդավոր երեխան, եւ մենք ձեզ հետ միասին պետք է դա կարեւորենք։ Այդ հոգեբանական մթնոլորտը պետք է ձեզ հետ միասին ձեւավորենք»։

Վարչապետ Տիգրան Սարգսյանը խոսեց երկրում կրթական ոլորտում ընդունելիք մոդելի ձեւից։ Նրա խոսքերով, երկու մոտեցում կա։ Առաջին մոդելն այն է, որ մեր բուհերը եւ, ընդհանրապես, կրթական օջախները պատրաստում են մասնագետներին շուկայի համար։ Շրջանավարտները ստանում են դիպլոմ եւ աշխատանքային շուկայում աշխատանք են որոնում։ Այդ շուկայում էլ «հանդիպում» են առաջարկն ու պահանջարկը, եւ այստեղ է, որ տարբեր չափանիշներ են գործում։ Առաջինը բուհի հեղինակությունն է։ «ԿԲ—ն, օրինակ, իր համար մի քանի բուհեր է ընտրել՝ որպես ռազմավարական գործընկեր, որովհետեւ տարիների ընթացքում փորձը ցույց է տվել, որ մենք ունենք տասնյակ բուհեր, բայց դրանց արտադրանքը որակյալ չէ,–նկատեց վարչապետը,–ու այդ երիտասարդները, որ գալիս էին ԿԲ, քննություն չէին բռնում։ Այս տարիների փորձը մեզ հուշեց, որ հիմնականում պետք է աշխատենք տնտեսագիտական համալսարանի եւ ԵՊՀ տնտեսագիտական ֆակուլտետի հետ, որովհետեւ մեր երիտասարդ մասնագետների գերակշիռ մասը հենց այս երկու բուհերն են պատրաստում։ Եվ պարզվեց, որ այս բուհերը քննություն բռնեցին շուկայական մրցակցության մեջ։ Բնականաբար, շուկայական տնտեսության կարեւորագույն տարրերից է այն, որ նաեւ բուհերի միջեւ պետք է մրցակցություն լինի կադրերի պատրաստման առումով»։
Կրթական ոլորտի մասով երկրորդ մոդելն այն է, որ աշխատատեղերի պահանջարկ ներկայացնող սուբյեկտները ամենասկզբից մասնակցում են տաղանդավոր երիտասարդների ընտրությանը։ Ըստ վարչապետի, հետեւում են նրանց ուսուցման ամբողջ գործընթացին, մասամբ վճարում են, կազմակերպում նրանց պրակտիկան իրենց մոտ։ Այսինքն, երբ շրջանավարտը դիպլոմ է ստանում, նա ի սկզբանե գիտի, թե որտեղ է աշխատելու. «Սա երկրորդ մոդելն է, որ նույնպես ՀՀ—ում փորձարկվում է. մասնավորապես, հայ—գերմանական համագործակցության շրջանակներում մենք ունենք պրոֆտեխուսումնարանների մի փորձնական ծրագիր, որի նպատակն էր հենց գերմանական մոդելի ներդրումը մեր ֆինանսական ոլորտում։
Դա մեր բանկային քոլեջն է, եւ արդեն շուրջ 7 տարի մենք բանկային հաստատությունների հետ փորձում ենք այդ երկրորդ ձեւը ներդնել։ Այսինքն, այդ երկու այլընտրանքներն էլ մեզ տրված են։ Կյանքը ցույց կտա, թե ՀՀ—ում որ մոդելն է ավելի կենսունակ»,–հայտնեց վարչապետը։
Հաշվի առնելով այս ամենը՝ Տիգրան Սարգսյանը կարեւորեց երեկվա հավաքը. «Ուզում եմ, որպեսզի այս հավաքի միջոցով մենք համապատասխան ազդակներ հաղորդենք հասարակությանը, որ կարեւորելու ենք պրոֆեսիոնալիզմը։ Բանկային համակարգում այս խնդիրը լուծված է։ Անգրագետ մասնագետներն այսօր բանկային համակարգից դուրս են մղվում, եւ բանկային ոլորտում կա մրցակցություն բանիմաց մասնագետների առումով։ Եվ աշխատավարձերը բավականին բարձր են։ Ընդ որում՝ առեւտրային բանկերում բարձր ղեկավարությունը ստանում է այնպիսի աշխատավարձ, որը համադրելի է եվրոպական բանկերի աշխատավարձերի հետ։ Այսինքն, մենք միջազգային ֆինանսական հատվածում այդ առումով արդեն իսկ մրցունակ ենք։ Եվ այսօր առեւտրային բանկերը ունեն պահանջարկ բարձր, որակյալ մասնագետների։ Եվ եթե դուք ուզում եք կարիերա անել, պետք է հասկանաք, որ գիտելիքը ամենակարեւոր արժեքն է։ Դուք կունենաք հեռանկար եւ կապահովեք բարեկեցություն ձեզ համար եւ ձեր ընտանիքի համար»,–ամփոփեց վարչապետը։
ՀՀ առեւտրի եւ տնտեսական զարգացման նախարարի պաշտոնակատար Ներսես Երիցյանը նկատեց, որ աշխատանքի այս շուկան շարունակական է լինելու. «Բիզնեսը հետաքրքրված է, մնում է ուսանողները նախաձեռնող լինեն։ Երկխոսությունը միակ ճանապարհն է՝ իրականացնելու հավակնոտ այս նոր ծրագրերը»։ Կրթության եւ գիտության փոխնախարար Արա Ավետիսյանն էլ հավելեց, որ կրթության եւ գիտության զարգացումն է, որ երաշխավորն է տնտեսության կայուն զարգացման։
Հավելենք, որ աշխատանքային այս տոնավաճառը, որ բանկային ու ֆինանսական ոլորտի մասով էր (ներկայացված էին ՀՀ—ում գործող բանկերը), նպատակ ուներ աջակցել ՀՀ բանկային եւ ֆինանսական կազմակերպությունների եւ բուհերի շրջանավարտների միջեւ գործատու—աշխատանք փնտրող անմիջական կապերի ամրապնդմանն ու զարգացմանը, զարգացնել շրջանավարտների եւ ուսանողների՝ աշխատաշուկայում ճիշտ կողմնորոշվելու եւ մրցունակ լինելու ունակությունները, աջակցել ՀՀ բանկային եւ ֆինանսական ոլորտի արդի հիմնախնդիրների լուծմանը եւ այդ գործընթացում ապահովել երիտասարդ կադրերի մասնակցությունը։

Արմենուհի ՄԵԼՔՈՆՅԱՆ
Source: http://www.hhpress.am

Permanent link:  http://www.armpress.com/hhpress/2008/04/15/993/

Comments

Leave a Reply

You must be logged in to post a comment.

    Thursday, 08 January 2009

  • Admin

  • Calendar

    • April 2008
      M T W T F S S
      « Mar   May »
       123456
      78910111213
      14151617181920
      21222324252627
      282930  

  • Archives

  • Links

  • Adv