-
Newspapers
-
Recently Written
- Հայաստանի իրական նախագահը
- Ереван 2008: Центр разгружен, но проблем хватает
- 2009 թվականը լինելու է համառ աշխատանքի տարի
- Ключи от Карабаха не в Ереване и не в Баку
- ԲՈՐԲՈՔՎՈՒՄ ԵՆ ԿՐՔԵՐԸ ԱԲԴՈՒԼԼԱՀ ԳՅՈՒԼԻ ՄՈՐ «ՀԱՅԿԱԿԱՆ» ԾԱԳՄԱՆ ՇՈՒՐՋԸ
- Turkish MP Urges Parliament to Apologize to Armenians; Brawl Ensues
- HyeSanta 2009: Making a mark while making a difference
- ՀԱՄԱՁԱՅՆԱԳԻՐ «ԲԱՐԳԱՎԱՃ ՀԱՅԱՍՏԱՆ» ԿՈՒՍԱԿՑՈՒԹՅԱՆ ԵՎ ՈՒԿՐԱԻՆԱՅԻ «ՌԵԳԻՈՆՆԵՐԻ ԿՈՒՍԱԿՑՈՒԹՅԱՆ» ՄԻՋԵՎ
- ДВОЙНЫЕ СТАНДАРТЫ ЕС
- Տեղեկատվական պատերազմներ
-
Search
-
-
Feb
5
Վազգեն Մանուկյան
«Այս տարածաշրջանում ապրելով` մենք երբեք Շվեյցարիա չենք լինելու: Մեզ իսկապես պետք է հզոր բանակ:
Առջեւում դեռ 10, 20, 30 տարի կտեւի, մինչեւ այս տարածաշրջանում սկսվեն որոշակի ինտեգրացիոն պրոցեսներ: Այդ ինտեգրացիոն պրոցեսները կբերեն նաեւ մեր անվտանգության ավելի բարձր երաշխիքների: Բայց այժմ, բացի քաղաքական երաշխիքներից, բացի միջազգային ուժերի երաշխիքներից, եթե մենք չունենք հզոր բանակ, մեծ արագությամբ կկորցնենք այն ամենը, ինչ ունենք, կկորցնենք նաեւ Հայաստանը»:
Սերժ Սարգսյան
«Մենք պատրաստ ենք և կարող ենք կառուցել ուժեղ և հպարտ Հայաստան, իսկ դա հնարավոր է, եթե երկրում համերաշխություն և միասնականություն է, երբ երկրում կա արդարություն, և կան ղեկավարներ, ովքեր պատրաստ են բաց խոսել ժողովրդի հետ՝ թերությունների և ձեռքբերումների մասին»:
«Այստեղ՝ Սասունցի Դավթի արձանի մոտ, առաջարկում եմ հիմք դնել հպա՛րտ Հայաստանի, հպա՛րտ, բայց ո՛չ մեծամիտ, հպա՛րտ, բայց ո՛չ ուրիշներին վերևից նայող, հպա՛րտ, բայց ո՛չ ամբիցիոզ, հպա՛րտ, բայց ո՛չ ագրեսիվ»:
«Այս սերնդի բոլոր ներկայացուցիչները քաջ պատկերացնում են, որ եթե Սերժ Սարգսյանին հաջողվի կատարել իր նախընտրական ծրագրում նախանշված բոլոր գաղափարներն ու ծրագրերը, ապա առաջին հերթին օգտվելու են հենց իրենք՝ երիտասարդները: Իրենք են, որ ապրելու են ավելի ապահով, ավելի բարեկեցիկ երկրում, իրենք են, որ ապրելու են ավելի ազատ ու ժողովրդավարական, եվրոպական չափանիշներին համապատասխան երկրում, իրենք են, որ ավելի մեծ հնարավորություններ են ունենալու իրենց երկրում»:
«Թեկնածուներից մեկը տարածում է լուրեր, որ եթե Սերժ Սարգսյանը դառնա նախագահ, ապա հանրապետության բոլոր պաշտոնյաները լինելու են ղարաբաղցի: Դա ցնդաբանություն է. որտեղ էլ աշխատել եմ, ես մարդկանց ընտրել եմ՝ հաշվի առնելով նրանց գիտելիքները եւ մարդկային որակները»:
«Տեսե՞լ եք, թե ինչպես է թեկնածուներից մեկը կոկորդիլոսի արցունքներ թափում եւ ասում, որ մեր թոշակառուները շատ վատ վիճակի մեջ են, հաշմանդամները ընդհանրապես ապրելու հնարավորություն չունեն եւ այլն: Այդ ընթացքում նա օդ կրակեց թվեր, չմտածելով, որ մարդիկ կարող են համեմատել եւ տեսնել, որ սուտ է ասում, իսկ սուտասան մարդը ինչպե՞ս կարող է նախագահ դառնալ»:
«Եթե 2012 թվականին մենք չապրենք երկու անգամ ավելի լավ, ես պատրաստ եմ իմ անունը փոխել եւ դնել այն մարդու անունը, ով ավելին է խոստանում, բայց վստահ եմ, այդպիսի առիթ չի լինի, որովհետեւ ձեզնից որեւէ մեկը չի կարող ասել, թե ես երբեւէ անիրականանալի խոստումներ եմ տվել, ընդհակառակը՝ միշտ համոզված եմ եղել, միշտ հավատացել եմ այն գործին, ինչին ձեռնամուխ եմ եղել»:
Վահան Հովհաննեսյան
«Ես զգուշացնում եմ, որ եթե մերոնք արձանագրեն, տեսնեն նման դեպքեր, երբ ընտրողին կպարտադրեն բաց քվեարկություն, ապա ես զգուշացնում եմ, որ այդ դեպքում մռութ է ջարդվելու»:
«Այսօրվա բոլոր արատները արամատավորվել են 90-ականների ռեժիմի ժամանակահատվածում:Ով ասաց, որ այսօրվա դժվարությունները կփոխեբն նրանք, ովքեր դրանց ստեղծողներն են: Ոչ մենք խաչ ենք քաշում էրեգվա օրվա վրա, մենք այսօրվանից դժգոհ ենք եւ գնում ենք առաջ դեպի վաղվա օրը, իսկ վաղվա օրը մեզ հետ է:Դաշնակցության հետ է: Դա ապացուցում է մեր ծրագիրը, որովհետեւ մեր ծրագրից ոչ մի հատված չես հանի»:
«Դժվար է: Կբերեն կուբամետրով փող կբաժանեն, կսպառնան, որ ով աշխատանք ունի, կհեռացնեն, ուրիշ ձեւերով էլ կսպառնան… Մյուս կողմից էլ արդեն ծեծուջարդ են սարքում միտինգների ժամանակ: Ես երդում եմ տվել` հարկ եղած դեպքում կյանքս պիտի այս ժողովրդի համար տամ: Ձեզանից կյանքը չի պահանջվում, միայն ազնվություն է պահանջվում»:
«Որովհետեւ ճարպիկ ու բիճ տիպեր մեր հասարակության մեջ մխրճվեցին իշխանության ու ժողովրդի արանքը: Սկսեցին տնօրինել ամեն ինչ, սեփականացրեցին ինչ որ կարող էին` կոպեկներով, ծախեցին ամեն ինչ արտասահման, ոչինչ չաշխատացրեցին, աշխատատեղերը փակեցին: Հիմա, իմիջիայլոց, նորից ոտքի են կանգնել: Նորից գալիս-փորձում են ձեր ականջների մեջ թույն լցնել… Մենք դրան չենք խաբվի»:
«Երբ ասում են` 12 տոկոս տնտեսական աճ կա, հավատում եմ… 12 տոկոսանոց աճը ձեր վրա տեսե±լ եք, 12 տոկոսով ավելի լա±վ եք ապրում: Բյուջեն 4 անգամ ավելացել է… իսկապես ավելացել է` բռավո… Դուք 4 անգամ ավելի լա±վ եք ապրում: Չէ: Ուրեմն Հայաստանի զարգացումը, նույնիսկ առկա զարգացումը, այն զարգացումը, որ 90-ականներին չկար, չէինք էլ երազում, 2000-ականներին եղավ: Եղավ, բայց նորից ժողովրդին ո’չ ազատություն տվեց, ո’չ հաց հանապազօրյա»:
Լեւոն Տեր-Պետրոսյան
«Այո, ես հայտարարում եմ, որ այդ հողը (Ղարաբաղը) 3000 տարի եղել է հայկական եւ 3000 տարի էլ դեռ մնալու է հայկական: Անհրաժեշտ է, որ այդ նվաճումը ամրագրվի միջազգային պայմանագրով, որից հետո, այո՛, մենք Ադրբեջանի հետ ե՛ւ համագործակցելու ենք, ե՛ւ բարիդրացիական հարաբերություններ ենք հաստատելու, որովհետեւ մեր ելքը դեպի արտաքին աշխարհ հիմնականում Ադրբեջանն է: Ադրբեջանական երկաթուղին էր ապահովում Հայաստանի բեռնափոխանակության 85 տոկոսը»:
«Նրանք ստացան լիակատար ազատություն` թալանելու այս երկիրը: Սրանք այնքան լկտի են գործել, այնքան ոչ գաղտնապահ, որովհետեւ համարել են, որ իրենց իշխանությունը հավերժ է, եւ ոչ ոք չի կարող իրենց ձեռքը բռնել: Բայց չարաչար սխալվել են, ինչպես բոլոր գողերը, որովհետեւ գողերը քաջ են, համարձակ են, լկտի են, երբ նրանց ձեռքը բռնող չկա: Երբ դա կա, նրանք դառնում են խղճուկ, ողորմելի, մատնիչ տարրեր: Նրանք արդեն բռնված են: Դրանով է բացատրվում նրանց վախը, խուճապը, իրենց մանկլավիկների միջոցով մեր հանրահավաքները խափանելու ջանքերը: Իրենց իշխանությունը պահպանելու այս կիրքը ոչ մի այլ բացատրություն չունի, եթե ոչ վախը, որ իրենք արդեն բռնված են, եւ ժողովուրդը նրանց արդեն իսկ մերժում է»:
«Մենք բացվելու ենք դեպի արտաքին աշխարհ: Մի երկաթուղին Ադրբեջանի երկաթուղին է, մյուսը` դեպի Թուրքիա գնացող: Այո, մենք պետք է բարիդրացիական հարաբերություններ հաստատենք նաեւ Թուրքիայի հետ: Մենք ուրիշ ճանապարհ չունենք. Ո’չ ծով ունենք, ո’չ երկաթուղի, ո’չ էլ անգամ ավտոճանապարհ…: Այն, ինչ այսօր ներկրվում է Մեղրիի ճանապարհով 1 տարվա ընթացքում, Ջուլֆայի երկաթուղով կարելի է 1 տարվա բեռը ներկրել 1 շաբաթվա ընթացքում: Պատկերացրեք դրա տնտեսական նշանակությունը: Մեր խնդիրն է` միջազգային պայմանագրով ամրագրել Ղարաբաղի ազատ, հայկական գոյությունը, երաշխավորել նրա անվտանգությունը, ազատությունը, տնտեսական զարգացումն ու բարգավաճումը եւ նորմալացնել մեր հարաբերությունները մեր բոլոր հարեւանների հետ: Եթե սա Ռոբերտ Քոչարյանը համարում է քիրվայություն` իր Կառշոլկի ֆաբրիկայի պարտկոմի ուղեղով, թող այդպես էլ համարի»:
«…ոստիկանության 90 տոկոսը, ես վստահ եմ, այս ժողովրդի հարազատ զավակն է եւ կանգնած է նրա կողքին: Նրանք ավելի են զզված այս իշխանություններից, քան դուք, որովհետեւ բացի կեղեքվելուց, բացի նվաստացվելուց, նրանց ստիպում են դուրս գալ սեփական ժողովրդի դեմ: Եվ ես վստահ եմ՝ նրանք դուրս չեն գա: Մի վախեցեք: Մեր ոստիկանությունը մեզ հետ միասին կանգնած էր Գորբաչովի տանկերի դեմ: Չկասկածեք, որ այսօր էլ՝ փետրվարի 19-ին նրանք լինելու են մեզ հետ: Նույնը վերաբերում է պետական մարմինների միջին օղակներին. նրանք մեզ հետ են: Նրանք՝ մենք ենք»:
Արտաշես Գեղամյան
«Լեւոն Տեր-Պետրոսյանի՝ նախագահի թեկնածու առաջադրվելը ոչ այլ ինչ է, քան իշխանությունների նախագիծ: Տրամաբանենք միասին: Բավական է, որ պարոն Քոչարյանը Ծաղկաձորից ի լուր հայության հայտարարեց, որ Տեր-Պետրոսյանը եւ իր թիմակիցները չեն հետապնդվելու թե նախկինում, թե հիմա եւ թե առաջիկայում գործած անօրինականությունների, ինչու չէ՝ հանցանքների համար, եւ անմիջապես աշխուժություն տիրեց պետրոսյանական թիմում: Ծեծուջարդ կազմակերպեցին Արագածոտնի մարզում, ըստ որում՝ ոստիկանության աչքերի առաջ ծեծում էին Արցախի ազատամարտի կամավոր ազատամարտիկներին: Ճիշտ այդ նույն օրը Երեւանից եւ Արարատից խառնաժողով կազմակերպվեց Կոտայքի մարզի Ողջաբերդ գյուղում, եւ այնտեղ Արամ Սարգսյանը սպառնաց ինձ եւ իմ սրբությունների սրբոց ընտանիքին»:
«Երբ սպանեցին հանրաճանաչ հեռուստալրագրող Տիգրան Նաղդալյանին, այդ սպանության մեղքը երկուստեք փորձում էին բարդել Արտաշես Գեղամյանի վրա: Սա էլ երրորդ սպառնալիքն է: Հետաքրքրականն այն է, որ այս կապակցությամբ հիշեցի այն բազում սպառնալիքները, որ հնչում էին իմ հասցեին ԵԽԽՎ-ում ունեցած իմ ելույթներից հետո, եւ ի՞նչ եք կարծում՝ ովքե՞ր էին ինձ սպառնում՝ թուրք-ազերիական պատվիրակները, հիմա ասես էստաֆետը փոխանցել են այստեղ իրենց դրածոներին՝ լեւոնականներին: Ուզում եմ զգուշացնել, կրակի հետ խաղ մի արեք, չէ՞ որ կանխատեսել էի, որ սադրանքներ եք գործելու, ամեն ինչ անելու եք, որ ապակայունանա իրավիճակը: Եվ, իհարկե, «Հայլուրը» «Հայլուր» չէր լինի, եթե Արամ Սարգսյանի՝ հասցեիս ասված սպառնալիքները չմասսայականացներ ՀՀ-ով մեկ: Հների եւ նորերի համագործակցությունը արդեն 10 տարվա պատմություն ունի»:
Արթուր Բաղդասարյան
«Իշխանությունն այնքան տագնապի մեջ է, որ ԱՄՆ նախագահական ընտրություններն ավելի շատ են լուսաբանվում, քան ՀՀ նախագահի ընտրությունները»:
«Եղեգնաձորում դպրոցի դասատուին կանչում, ասում են՝ գնա, 10 հոգու ցուցակ բեր: Չի՛ կարելի պարտադրելով քվեարկել: Պարտադրանքը ծնում է ատելություն: Ով ուզում է՝ թող գնա, սրտով, ջիգյարով՝ ում ուզում է քվեարկի: Բայց ոչ թե քվեարկի փողով ու պարտադրանքով»:
«Կռվելու ենք, պայքարելու ենք մեր քվեների, մեր ձայների համար: Բոլոր էն մարդիկ, ովքեր խոչընդոտելու, խանգարելու են, ընտրական հանցագործություններ են անելու՝ դրանց դատելու ենք, պատժելու ենք մինչեւ վերջ»:
«Ժողովրդի մեջ փորձում են սերմանել՝ մեկ ա, սենց ա ու վերջ՝ ի՜նչ ընտրություն, ի՜նչ բան: Ես ասում եմ՝ ոչ, չի՛ լինելու նման բան: Դուք ամեն մեկդ ձեր գյուղում, ձեր բնակավայրում պիտի կանգնեք: Մենք էլ սարի պես ձեր մեջքին կանգնած ենք: Պիտի պայքարենք, կռիվ տանք: Ուրիշ տարբերակ չկա»:
«Եթե այսօր էդքան հզոր է իշխանությունը՝ ինչի՞ է ընկել մարդկանց վախեցնում, ինչի՞ են արգելում գալ հանդիպումների: Բա հզոր եք, չէ՞, բա գնացեք՝ արդար անցկացրեք: Ուրեմն՝ այդ ամենը թվացյալ է»:
Source: http://www.hetq.am
Permanent link: http://www.armpress.com/hetq/2008/02/05/910/Comments
Leave a Reply
You must be logged in to post a comment.
