Dec

19

ՄԱԴՐԻԴՈՒՄ ԵԱՀԿ ԼՂ ՀԱՐՑՈՎ ՄԻՆՍԿԻ ԽՄԲԻ ՓՈԽԱՆՑԱԾ ՓԱՍՏԱԹՂԹԻՆ ՀԱՅԱՍՏԱՆԸ ԴԵՌ ՀԱՄԱՁԱՅՆՈՒԹՅՈՒՆ ՉԻ ՏՎԵԼ

Filed Under AZG Armenian Daily 

ՄԱԴՐԻԴՈՒՄ ԵԱՀԿ ԼՂ ՀԱՐՑՈՎ ՄԻՆՍԿԻ ԽՄԲԻ ՓՈԽԱՆՑԱԾ ՓԱՍՏԱԹՂԹԻՆ ՀԱՅԱՍՏԱՆԸ ԴԵՌ ՀԱՄԱՁԱՅՆՈՒԹՅՈՒՆ ՉԻ ՏՎԵԼՄադրիդում նոյեմբերի 29-30-ին ԵԱՀԿ ԱԳ նախարարների հերթական հանդիպմանը քննարկումները քիչ ավելի բարդ էին, քան նախորդ տարի: «Ազգը» մանրամասն ներկայացրել է մադրիդյան քննարկումները, միայն նշենք, որ երեկ հրավիրած ասուլիսում ԱԳ նախարար Վարդան Օսկանյանը եւս մեկ անգամ հիշեցրեց, որ հերթական անգամ չընդունվեց քաղաքական հայտարարություն: Մասնակիցներն ընդհանուր հայտարարի չեկան ԵԱՀԿ բարեփոխման, ահաբեկչության դեմ պայքարի, հակամարտությունների կարգավորման, սպառազինությունների վերահսկման պարբերությունների շուրջը:

Օսկանյանը, ի թիվս անհանդուրժողականության եւ խտրականության դեմ պայքարի, Աֆղանստանում ԵԱՀԿ ներգրավվածության, մարդկանց թրաֆիկինգի դեմ պայքարի, բնապահպանության առնչությամբ որոշումների կարեւորության, ընդգծեց ղարաբաղյան հակամարտության կարգավորման բանակցություններին առնչվող մադրիդյան հանդիպումները: «Ազգն» այդ կապակցությամբ ներկայացրել է ինչպես Հայաստանի եւ Ադրբեջանի, այնպես էլ ԵԱՀԿ Մինսկի խմբի համանախագահների անդրադարձները հանդիպումներին:

Դեկտեմբերի 4-5-ին նախարար Օսկանյանն աշխատանքային այցով Մոսկվայում էր` հագեցած օրակարգով: ՌԴ ԱԳ նախարար Սերգեյ Լավրովի հետ հանդիպմանը լավ մթնոլորտում քննարկել են հայ-ռուսական հարաբերությունները, մտքեր են փոխանակել տարածաշրջանային եւ գլոբալ խնդիրների (ԵՍԶՈՒ պայմանագիր, Կոսովոյի հիմնահարց, ԵԱՀԿ բարեփոխումներ, ռուս-վրացական հարաբերություններ եւ դրանց ազդեցությունը Հայաստանի վրա) շուրջը, անդրադարձել Լեռնային Ղարաբաղի հիմնահարցին:

Մոսկվայում Օսկանյանը հանդիպել է նաեւ ՀԱՊԿ գլխավոր քարտուղար Նիկոլայ Բորդյուժայի հետ, քննարկել կազմակերպության շրջանակներում հետագա համագործակցությունը, ինչպես նաեւ հաջորդ տարի այդ կազմակերպությունում Հայաստանի նախագահության հետ կապված հարցեր:

Հայաստանում հավատարմագրված, բայց Մոսկվայում նստավայր ունեցող դիվանագիտական ներկայացուցչությունների ղեկավարների հետ հանդիպմանն էլ Օսկանյանը ներկայացրել է Հայաստանի արտաքին քաղաքականության առաջնայնություններն ու Լեռնային Ղարաբաղի հակամարտության կարգավորման վերջին զարգացումները, Հայաստանում իրականացվող բարեփոխումների եւ տնտեսական զարգացումը, ինչպես նաեւ նախագահական ընտրություններից առաջ ստեղծված իրավիճակը:

Օսկանյանի խոսքերով, հատուկ շեշտադրում է արվել ՎՈՒԱՄ (Վրաստան, Ուկրաինա, Ադրբեջան, Մոլդովա) գործունեությանը` նկատի ունենալով ՄԱԿ-ի շրջանակներում մեր տարածաշրջանի «սառեցված հակամարտությունների» առնչությամբ ընդհանրական մոտեցումներով նախաձեռնությունները:

Դեկտեմբերի 7-ին աշխատանքային այցով Ստրասբուրգում արտգործնախարարը հանդիպել է ԵԽ ԱԳ նախարարների կոմիտեի մոնիտորինգի Ագոյի հանձնախմբի անդամներին: Ագոյի խմբի ղարաբաղյան հարցում ներգրավվածությունն էլ, ըստ Օսկանյանի, այնքանով է, որքանով խաղաղ կարգավորումը Հայաստանի պարտավորությունն է:

ԵԽ գլխավոր քարտուղար Թերի Դեւիսի հետ էլ քննարկվել են Նախիջեւանում մշակութային ժառանգության իրավիճակը գնահատելու նպատակով փաստահավաք առաքելության այցին առնչվող հարցեր, ղարաբաղյան ու նախընտրական հարցեր: Ընդ որում, այդ առաքելությունն ամենայն հավանականությամբ կարող է իրականություն դառնալ հաջորդ տարվա առաջին քառորդում: Օսկանյանի ներկայացմամբ, Հայաստանն ու Լեռնային Ղարաբաղն արդեն իսկ համաձայնել են իրենց տարածքում դիտարկումներին:

Ամեն դեպքում, Վարդան Օսկանյանը լավատես է ղարաբաղյան հարցի կարգավորման բանակցություններում, եւ այն, որ վարչապետ Սերժ Սարգսյանը եւս լավատես է, միայն դրական է: Ավելին, վարչապետը տեղեկացված է բանակցությունների ընթացքից, բայց չէր կարող հայտարարել, թե արդեն իսկ Հայաստանը համաձայնություն է տվել Մադրիդում ներկայացված թարմացված առաջարկներին:

«Ցանկություն կա հնարավորինս շուտ կարգավորման սկզբունքների շուրջը համաձայնության գալու, քանի որ դրանից հետո խաղաղության պայմանագիրն է, որ շատ բարդ ու երկարատեւ աշխատանք է պահանջելու», գտնում է Օսկանյանը: Ինչ վերաբերում է նույն բանակցային գործընթացի առնչությամբ, լրագրողների ձեւակերպմամբ, նախագահ Քոչարյանի հոռետեսությանը, ապա, Օսկանյանի խոսքերով, հոռետեսը տեղեկացված լավատեսն է, եւ երեւի նախագահն այլ կերպ է նայում հարցին:

ԱՂԱՎՆԻ ՀԱՐՈՒԹՅՈՒՆՅԱՆ
Source: http://www.azg.am

Permanent link:  http://www.armpress.com/azg/2007/12/19/733/

Comments

Leave a Reply

You must be logged in to post a comment.

    Wednesday, 08 February 2012

  • Admin

  • Calendar

  • Archives

  • Links

  • International newspers: